Universiteti Hëna e Plotë (Bedër) organizoi sot programin e trajnimit me temë “Islami dhe komunikimi në publik” për një numër të konsiderueshëm imamësh dhe studentë teologjie. Pjesëmarrësit në këtë aktivitet vinin nga qytete të ndryshme të Shqipërisë si Durrësi, Elbasani dhe Kavaja.
Ky trajnim u nda në disa sesione të ndryshme ku referuesit përkatës trajtuan tema të tilla si: “Rëndësia e unitetit dhe solidaritetit në Islam”, “Arti i komunikimit në publik”, si dhe “Metodat e kumtesës dhe karakteristikat e kumtuesit”.
Aktiviteti në fjalë u përshëndet gjithashtu edhe nga Nënkryetari i Komunitetit Mysliman të Shqipërisë z. Bujar Spahiu. I cili gjatë fjalës së tij shprehu mirënjohje ndaj Universitetit Hëna e Plotë (Bedër) që mundësoi këtë aktivitet. Gjithashtu ai nuk la pa përmendur as rëndësinë që ka në ditët e sotme një e folur sa më e kompletuar në prezantimin e fesë Islame apo tematikave të ndryshme të saj.
Në fund të aktivitetit gjatë shpërndarjes së certifikatave, të pranishmit e vlerësuan këtë organizim mjaft të rëndësishëm në përmirësimin e cilësisë së komunikimit të fesë Islame në publik.
Zëvendësrektori dhe Dekani i Fakultetit të Shkencave Humane në Universitetin Hëna e Plotë Bedër Prof. Dr. Ayhan Tekinesh së bashku me drejtues të Komunitetit Mysliman të Shqipërisë zhvilluan një vizitë pune Kosovë dhe Maqedoni. Delegacioni në përbërje të të cilit ishin nënkryetari i KMSH-së z. Skender Bruçaj, drejtori i Kulturës në KMSH z. Genti Kruja, si dhe shefi i Departamentit të Shkencave Islame në Universitetin Bedër z. Adil Kutllu, u prit nga kreu i Bashkësisë Islame të Kosovës Myftiu H. Naim Tërnava dhe stafi i tij.
Gjatë qëndrimit në Prishtinë delegacioni zhvilloi një vizitë edhe në Fakultetin e Shkencave Islame, ku u prit nga Dekani Prof. Dr. Qazim Qazimi dhe stafi i universitetit. Të dyja palët ranë dakord për një bashkëpunim akademik me aktivitete të përbashkëta në të tre qendrat, Tiranë, Prishtinë dhe Shkup. Në fund të takimit dekani i Prishtinës i dorëzoi një certifikatë mirënjohje zv/rektorit të Universitetit Bedër Prof. Dr. Ajhan Tekinesh për bashkëpunimin e frytshëm të deritanishëm.
Pas vizitës në Prishtinë, delegacioni nga Shqipëria vijoi vizitën në Shkup, në Bashkësinë Fetare Islame të Maqedonisë, ku u pritën nga kreu i kësaj bashkësie H. Sulejman Rexhepi dhe sekretari i përgjithshëm z. Afrim Tahiri. Z. Rexhepi shprehu kënaqësinë për këtë vizitë dhe theksoi se dyert e bashkëpunimit në Shkup do të jenë gjithmonë të hapura dhe do të kenë përkrahjen më të lartë institucionale.
Më pas, delegacioni vizitoi Fakultetin e Shkencave Islame të Shkupit, ku u prit nga dekani Prof. Dr. Fahredin Edipi, si dhe stafi akademik. Z. Edipi ka shprehur gjithashtu gatishmërinë e tij për një bashkëpunim të ngushtë në fushën akademike midis fakultetit dhe Komunitetit Mysliman të Shqipërisë dhe Universitetit Bedër.